Image default
Poems

ಎಂಥ ಚೆಂದ

 ಮುಖದ ಸುಕ್ಕು-ಮಡಿಕೆಗಳ ಬಿಡಿಸಿ,

ನಯವಾಗಿ ಸವರಿ

ಇಸ್ತ್ರಿ ಮಾಡಿ

ಗರಿಗರಿ ಮಾಡುವಂತಿದ್ದರೆಷ್ಟು ಚೆನ್ನ?

ಎದೆಯೊಳಗೆ

ಮಡುಗಟ್ಟಿ ನಿಂತ

ಕಹಿನೆನಪುಗಳ ಮೀಟಿ

ಬೊಗಸೆಗಟ್ಟಲೆ ಸಿಹಿಗನಸ

ಸುರಿಯುವಂತಿದ್ದರೆಷ್ಟು ಚೆನ್ನ?

ಮೈತುಂಬ

ಕಲೆತು-ಕೊಳೆತಿರುವ

ನಂಜು-ನರಕಗಳ

ಭಂಗು-ಬರೆಗಳ

ರಬ್ಬರಿಂದಳಿಸಿ

ರಂಗೋಲೆ-ಚಿತ್ತಾರ

ಬಿಡಿಸುವಂತಿದ್ದರೆಷ್ಟು ಚೆನ್ನ?

ಕಳೆದ ವರುಷಗಳ ಹೊಸಕಿ

ಹಗಲು ರಾತ್ರಿಗಳ ನಿಲಿಸಿ

ಬಿಸಿಲು-ಮಳೆಗಳ ಎತ್ತಂಗಡಿಸಿ

ಕಾಲಾತೀತ

ಗೊಮ್ಮಟ ಶಿಲೆಯಾಗಿ

ಅದರ ಹೊಕ್ಕುಳ ಕಲೆಯಾಗಿ

ಕಾಲ ಕಾಲಕೆ

ಉಳಿಯುವಂತಿದ್ದರೆಷ್ಟು ಚೆನ್ನ?

ಕಾಲ ಸುತ್ತಿಕ್ಕುವ

ಸರಪಳಿಗಳ ಕಿತ್ತೊಗೆದು

ಬಾನ ಬಯಲಲಿ

 ತೊಂಗು ತೊಡಕಿಲ್ಲದೆ

ಹಂಗಿಲ್ಲದ ಹಕ್ಕಿಯಾಗಿ

ಹೊಳೆವ ಚಿಕ್ಕಿಯಾಗಿದ್ದರೆಷ್ಟು ಚೆನ್ನ?

Related posts

ಪ್ರಕೃತಿ ವಿಸ್ಮಯ-ಹನಿಗವಿತೆಗಳು

YK Sandhya Sharma

ಗೂಢ-ನಿಗೂಢ

YK Sandhya Sharma

ಪ್ರೇಮ ನಿವೇದನೆಯ ಹನಿಗವಿತೆಗಳು

YK Sandhya Sharma

Leave a Comment

This site uses Akismet to reduce spam. Learn how your comment data is processed.