ಅತ್ತ-
ಎದೆಯೊಳಗೆ ರಿಂಗಣಗುಣಿವ
ಪಾಪಭೀತಿಯ ಸಂಚಯವನೆಲ್ಲ
ತಲ್ಲಣಿಪ ಭಕ್ತಿ ಭಾವದಿ
ಮುಗಿದ ಕೈಗಳಲಿ
ಭದ್ರ ಹುದುಗಿಸಿ
ಗರ್ಭಗುಡಿಯ ಗಾರುಡಿಗನ
ಕೃಪೆಯ ನೆಚ್ಚಿ
ತಪ್ಪು ಕಾಣಿಕೆ-ದಕ್ಷಿಣೆ-ಹರಕೆಯಲಿ
ಶುಚಿರ್ಗೊಂಡ ಭ್ರಮಾಲೋಕದಿ
ಕಣ್ಮುಚ್ಚಿ ತನ್ಮಯದಿ
ಶರಣು ಭಕ್ತಸ್ತೋಮ
ಇತ್ತ-
ದೇವರು ಇಲ್ಲೇ ಇದ್ದಾನೆ
ಎಂಬ ಜಗತ್ ಜಾಹೀರು
ಜೋರು ಜಾಗಟೆ-ಘಂಟೆ
ಮಂತ್ರಬೂದಿಯ
ಮಂಗಳಾರತಿ ಬೆಳಗಿ
ಕೆಂಧೂಳಿಯಾರ್ಚನೆ ಬೆಡಗು
ಪುಷ್ಪ-ಪ್ರಸಾದ ಪ್ರಸ್ಥಾನಗಳ
ಜವನಿಕೆ
ತೆರೆ ಮರೆಯ
ದಿನನಿತ್ಯ ಈ ಏಕತಾನದ
ಗೊಂಬೆಯಾಟದಿ ಪಳಗಿದ
ಪೂಜಾರಿಗೊಬ್ಬನಿಗೇ ಗೊತ್ತು
ದೇವರು ಇಲ್ಲಿಲ್ಲವೆಂದು!
2 comments
ನಿಮ್ಮ ಅಂತರ್ಜಾಲ ಪತ್ರಿಕೆ ಮೈದುಂಬಿ ಬರುತ್ತಿದೆ.ಕವಿತೆ, ಕಿರುಗತೆ,ಪುಸ್ತಕ ವಿಮರ್ಶೆ ಮುಂತಾದುವುಗಳು ಹೆಚ್ಚು ಕಾಣಿಸಿಕೊಳ್ಳಲಿ,ಉರಯೋನ್ನುಖರಿಗೆ ಒಂದು ಒಳ್ಳೆಯ ವೇದಿಕೆ ಯಾಗಲಿ
ಅಭಿನಂದನೆಗಳು.
ನಿಮ್ಮ ಅಮೂಲ್ಯ ಸಲಹೆಗೆ ಧನ್ಯವಾದಗಳು.